ཨ་སྔོན་ཉི་མས་འགྲོ་བའི་མུན་པ་སེལ།།
ཧ་ལམ་དཔེ་ཟླར་འོས་པ་དགེ་རྒན་ཏེ།།
ཨ་ལ་དུས་ཆེན་སྐལ་བཟང་ཉིན་མོ་ལ།།
ཧ་ཅང་གུས་པས་ཅུང་ཙམ་བསྟོད་ལ་སྤྲོ།།
ས་སྟེང་སྐལ་ལྡན་རིག་པའི་དོན་གཉེར་རྣམས།།
ཤ་ཚ་ཐུགས་བརྩེས་རྗེས་སུ་བཟུང་དང་ལྷན།།
ལ་ལུང་དབྱེར་མེད་ཀུན་ལ་མ་ལྟར་བྱམས།།
ར་གན་གསེར་དུ་བསྒྱུར་བའི་ལས་ལ་བརྩོན།།
ཡ་རབས་སྤྱོད་བཟང་ཡར་དཔེ་ཞྭ་ལྟར་མཛེས།།
འ་རི་འུ་རིའི་སྐྱོན་ཆས་མ་གོས་ཤིང་།།
ཟ་ལུགས་འགྲོ་སྟངས་ཚུན་ཆད་ལུགས་མཐུན་དུ།།
ཞ་ཞིའི་དུས་ནས་ངང་རྒྱུད་རིང་པོས་བསླབས།།
ཝ་སྤུའི་གྲ་ལྟར་དཀའ་གནད་སེལ་བ་ལ།།
ཛ་ཡ་ལྟ་བུའི་ཐོགས་མེད་ཤེས་རབ་མངའ།།
ཚ་གྲང་ནད་ཀྱིས་གདུང་བའི་དུས་ལ་ཡང་།།
རྩ་ནས་མི་འཛེམས་སྙིང་སྟོབས་གོ་ཆ་བགོས།།
མ་ཡིག་ཕ་སྐད་འཛིན་སྐྱོང་སྤེལ་བའི་སླད།།
བ་རྒན་བཞིན་དུ་འོ་མའི་བཅུད་འཕྱུངས་ཏེ།།
ཕ་རོལ་སློབ་མའི་ཁམས་དབང་བསྟུན་མཁས་ཀྱིས།།
པ་ཎཾ་བུམ་པ་གང་བྱོ་ཚུལ་དུ་བསྩལ།།
ན་ཚོད་མཐོན་པོས་ལུས་པོ་རྒས་འཁོགས་ཀྱང་།།
ད་དུང་ལཱ་ཆ་བཞིན་དུ་རང་ལུས་ཀྱིས།།
ཐ་ན་འགྱོད་པ་ཙམ་ཡང་མེད་པའི་ངང་།།
ཏ་ལེར་གཞན་གྱི་མདུན་ལམ་གསལ་ལ་འབུངས།།
ཉ་མའི་དུས་ཀྱི་དངོས་བྱུང་མྱོང་ཚོར་རྣམས།།
ཇ་ཁང་ལྷིང་འཇགས་ཤག་མིག་གྲུ་བཞི་ནས།།
ཆ་ཚང་ཚིག་གིས་བརྗོད་པར་མི་ལང་ཡང་།།
ཅ་ནེའི་ནང་གི་ཐིགས་པ་ཙམ་ཞིག་བཀོད།།
ང་གཞན་བཀུར་འོས་དགེ་རྒན་ཡོངས་རྫོགས་ལ།།
ག་སར་མཛད་འཕྲིན་དབྱར་མཚོ་བཞིན་དུ་རྒྱས།།
ཁ་ལས་རླུང་རྟ་དར་ཞིང་སྐུ་ཚེ་བརྟན།།
ཀ་ཆེན་བུ་སློབ་ས་སྟེང་གང་བར་སྨོན།།
༼ འབའ་བློ་བཟང་ཟླ་བ ༽