ངར་རྣམ་དཔྱོད་བློ་མིག་གནང་མཁན་གྱི།།
མགོན་བཤེས་གཉེན་སྐུ་ཁམས་བདེ་མོ་ལགས།།
ངས་དགེ་རྒན་དུས་ཆེན་འཆར་ཉིན་འདིར།།
མགོན་སློབ་དཔོན་དྲན་བཞིན་རྟེན་འབྲེལ་ཞུ།།
མཁྱེན་ཤེས་བྱའི་ལྡུམ་རྭ་ཡངས་མོའི་ངོས།།
བརྩེ་བྱམས་སེམས་སྦྲང་ཆར་བབས་ཐེངས་རེར།།
ཁྱེད་རྣམ་རིག་འདབ་མ་གྲོལ་སེ་གྲོལ།།
ང་སློབ་བུའི་ཡིད་སེམས་མྱོས་སེ་མྱོས།།
སྒོམ་ཐོས་བསམ་མཚོ་མོ་བརྩོན་པས་རྐྱལ།།
རྩོམ་འཆད་རྩོད་ལ་མོ་རྡོག་པས་བཅད།།
ཐུགས་སྐུ་གསུང་དངོས་གྲུབ་ལེན་མཁས་ཀྱི།།
མགོན་བཤེས་གཉེན་དུས་ཆེན་སྐྱིད་པར་ཤོག།
ཁྱེད་ལྟ་སྒོམ་སྤྱོད་པའི་གཤོག་རྩལ་གྱིས།།
མཐོ་ཤེས་བྱའི་མཁའ་ལ་ལྡིང་དུས་སུ།།
བདག་སློབ་བུས་དད་གུས་སྐྱེ་བཞིན་དུ།།
རྟགས་རྟེན་འབྲེལ་འགྲིག་པའི་སྨོན་ལམ་འདེབས།།
དུས་ད་རེས་དགེ་རྒན་དུས་ཆེན་འདིར།།
ཁྱེད་ད་བར་སྐུ་ལས་ཁག་སོང་ཞུ།།
སྒོས་བདག་གི་དེད་དཔོན་ཁྱེད་མཆོག་ལ།།
ངས་ཆེད་དུ་སྐུ་དྲིན་ཆེ་ལགས་ཞུ།།
༼ བཙན་རྒོད། ༽