དབྱངས་ཀྱི་རྒྱུད་སྐུད་དཀྲོལ་པའི་གདངས་ཆ་ལ།།

ཚངས་སྲས་མགྲིན་བརྒྱ་སྡེབ་པའི་སྣང་བ་གྲོལ།།

ཀུན་རྟོག་ལྡེབས་ངོགས་འཆར་པའི་མེ་ཏོག་འདི།།

ཡིད་ཀྱི་ངོགས་སུ་མཛེས་པའི་དབྱངས་ཅན་མ།།

ངག་རིག་འཇའ་ཚོན་ཚེས་པའི་ཉམས་འགྱུར་དུ།།

ཚིག་རྒྱན་ཡལ་འདབ་དགོད་བའི་པད་མ་འཛུམ།།

སྡེབ་སྦྱོར་ལེགས་པ་དགྱེས་པའི་འོད་ཆགས་ཅན།།

ཡིད་སེམས་རྒྱ་མཚོ་སྐྱོམས་པའི་དབྱངས་ཅན་མ།།

སྙན་དབྱངས་རྒྱ་མཚོ་སྐྱོམ་པའི་རླབས་རིས་སུ།།

ཚིག་རྒྱན་འདབ་མ་ཐོར་བའི་ཚེམས་ཕྲེང་གྲོལ།།

ཡིད་འགྱུ་རླུང་གིས་བསྐྱོད་བའི་ཉམས་སྣང་དུ།།

སྒྱུ་མའི་གཟུགས་སྣང་གཡོ་བའི་དབྱངས་ཅན་མ།།

ཚངས་སྲས་བྱིན་རླབས་འཕྱུར་བའི་ངག་རིག་ཏུ།།

ཚོགས་དྲུག་བུང་བ་ལྡིང་བའི་མཚར་སྡུག་དགོད།།

འཆར་སྒོ་ཡངས་པའི་པད་མའི་འཛུལ་ཞལ་ནས།།

ཚིག་རྒྱན་དྲི་བསུང་འདེད་པའི་དབྱངས་ཅན་མ།།

ཚངས་སྲས་འཛུམ་པ་དགྱེས་པའི་གདངས་ཆ་ལ།།

ལེགས་བཤད་སྟོང་གིས་སྤུད་པའི་སྙན་ཚིག་གྲོལ།།

ཡིད་ཀྱི་དབྱངས་བདུད་དཀྲོལ་བའི་འཁྲི་ཤིང་ལ།།

ངག་གི་བྱིན་རླབས་གནང་བའི་དབྱངས་ཅན་མ།།

ཀུན་རྟོག་སེམས་ཀྱི་འདབ་མ་གཡོ་བའི་ངོགས།།

རིག་བྱེད་ངག་གི་རླབས་ཕྲེང་ཡེར་ཡེར་བསྐྱོད།།

སྒྱུ་མའི་མཐིལ་གཞུང་ཡངས་པའི་འཁོར་གྲོང་དུ།།

ཚོགས་དྲུག་འཆར་སྒོ་རུབ་པའི་དབྱངས་ཅན་མ།།

གཉུག་མའི་སེམས་ཀྱི་མེ་ལོང་ཡངས་པའི་ངོས།།

ཚིག་རྒྱན་གཏོར་བའི་ལྗོན་བཟང་ལྡེམ་ལྡེམ་སྒུལ།།

སྙན་འཇེབས་དབྱངས་ཀྱི་ཟིལ་བ་ཐར་ཐོར་ནས།།

སེམས་ཀྱི་གདངས་ཆ་སློང་བའི་དབྱངས་ཅན་མ།།