སྟོང་པར་གཡེང་བའི་སེམས་ཀྱི་མེ་ལོང་འདི།།
སྨུག་སྤྲིན་ལོ་འདབ་གཡོ་བའི་ངང་ཚུལ་གྱིས།།
ཅི་ཡང་མེད་པའི་ཚུལ་གྱིས་ཡུན་ཙམ་ཞུགས།།
དུས་ཚོད་གོམ་སྒྲ་བཞུར་བའི་དབྱངས་ཀྱི་དབུས།།
མི་རྟག་རླུང་གིས་གཡོ་བའི་ཆོས་ཉིད་མཐོང་།།
སྐྱེ་འཆི་ཐལ་རྡུལ་འཚུབ་པའི་སྣང་བརྙན་ལས།།
སྐྱོ་བའི་གཏམ་དང་དགའ་བའི་གཞས་ཀྱང་ཐོས།།
ཕུགས་བསམ་མེ་ཏོག་དུད་པའི་ཉམས་སྣང་དུ།།
རེ་བའི་འོད་སྣང་མཁའ་ལས་ཡལ་བ་མཐོང་།།
འཚབ་འཚུབ་མི་སེམས་བཞིན་གྱི་སྤྲིན་དཀར་འདི།།
རླུང་བུས་དེད་ནས་ཡར་ཡར་རྒྱང་ལ་བཞུད།།
རྙོག་འཛིང་ཐལ་རྡུལ་འཚུབ་པའི་འཁོར་བ་ནས།།
སེམས་ཀྱི་འདབ་མར་བཏགས་པའི་གཉེར་མ་ཀུན།།
ཚེ་རབས་འགའ་ཡི་ལན་ཆགས་འདུས་པ་སྟེ།།
རྣམ་ཤེས་གསེང་གི་ངལ་དུབ་ནམ་དུ་དཀྲོགས།།
འཁོར་བའི་ཆོས་ཉིད་གཡོ་བའི་གར་སྟེགས་ལས།།
བསླུ་བྲིད་སྐར་མ་གྲངས་མེད་ངང་གིས་འཕྲོས།།
སྒྱུ་མའི་ཚོར་བ་སྒུལ་པའི་ཟློས་གར་འཁྲབ།།
སེམས་ཀྱི་འཇའ་རིས་འཁྲེང་ཞེན་ཚོགས་དེ་ནས།།
དྲན་སྣང་མཐའ་ཡས་རྣམ་རྟོག་ལང་ལོང་གིས།།
རྟག་པ་མེད་པའི་རོལ་དབྱངས་དལ་གྱིས་དཀྲོལ།།
རྨི་ལམ་གཙང་པོས་ཁུར་བའི་མཚན་གཞུང་ལས།།
ཁེར་རྐྱང་གདུང་བ་འཚུབ་པའི་དགུ་ཚིགས་འཆར།།
ལྷིང་འཇགས་རླབས་རིས་འཁྱིལ་བའི་སྣང་བ་ཡིས།།
ཕྱོགས་ཀུན་གཡེང་བའི་རྣམ་ཤེས་གཅིག་ཏུ་བཀུག།
ཐར་ཐོར་བྲུལ་བའི་ཚོར་བའི་ཡིག་ཚོགས་ཀྱིས།།
ཡིད་འཛིན་མེ་ལོང་ངོགས་སུ་ལྷང་ལྷང་གསལ།།
ཅུང་ཙམ་སྟོང་བར་གཡེང་བའི་ནང་སེམས་ཀྱང་།།
ཞོགས་པའི་སྐྱ་རེངས་བཞིན་གྱིས་འཕྲལ་དུ་མངོན།།