སྙན་ཚིག་འདབ་བརྒྱའི་མེ་ཏོག་ཁྱོད་ལ་འབུལ།།
སྦྲང་ཆར་བྱབས་ཁྲུས་བྱས་པའི་ལྗང་ལོར་འདྲ།།
ཡིད་འོང་ས་སྲོད་མཛེས་པའི་འཆར་ཡན་འོག །
མ་གསང་སྙིང་གི་མཁའ་དབྱིངས་ཁྱོད་ལ་སྟོན།།
སེམས་ཀྱི་སྙིང་གཏམ་ཁྲོམ་ཁྲོམ་ཁྱོད་ལ་འབུལ།།
ཆར་རྗེས་འཇའ་ཚོན་བརྒྱན་པའི་རི་མོ་བཞིན།།
དུང་སེམས་སྤྲིན་དཀར་གཡོ་བའི་ངང་ཚུལ་དུ།།
བརྩེ་བའི་གཞས་ཀྱི་གདངས་སྙན་ཁྱོད་ལ་ལེན།།
འཁྲེང་ཞེན་ཡིད་ཀྱི་མཆོང་ལྡིང་ཁྱོད་ལ་འབུལ།།
གཙང་པོའི་བཞུར་སྒྲ་ལྟ་བུ་སྙན་འཇེབས་ལྡན།།
དྲན་པའི་མུ་ཏིག་ཚེས་པའི་མཁའ་དབྱིངས་སུ།།
ཁྱོད་ནི་ཟླ་བའི་ཞལ་དཀར་འཆར་བར་བསྒྲུན།།
ལས་འཕྲོ་ཐག་སྐུད་འཐེན་པའི་ལམ་འཁྲིས་སུ།།
དབྱར་ཁའི་དྲི་བཟང་ཐར་ཐོར་གཡོ་བའི་ངང་།།
རེ་སྒུག་སྟོང་གིས་བསྐོར་བའི་ལན་ཆགས་ཤིག །
མིག་ཟུང་མཚོ་མོར་འཕྱུར་ཏེ་ཁྱོད་ལ་གཟིགས།།
ཁྱོད་ནི་ལྗོན་ཤིང་བསྐྱོད་པའི་གྲིབ་བསིལ་འོག །
སྐྲ་ནག་འཇམ་རླུང་བསྒུལ་ནས་བག་ཕེབས་རོལ།།
མིག་ལ་དགུ་ཚིགས་འཚེར་པའི་མཛེས་སྡུག་ཏུ།།
སྐྱེ་བ་སྔོན་མའི་ལས་ཀྱི་བསྡུས་གཟུགས་ཡོད།།
ཁོ་བོས་ཚིག་གིས་བསླུས་པའི་ཡལ་འདབ་ཅིག།
ལྷ་མོའི་བྱིན་རླབས་བསྡེབས་ནས་ཁྱོད་ལ་སྤྲིངས།།
སྙིང་གི་ཞེན་ཁ་དགོད་པའི་མཚམས་སྤྲིན་ཞིག །
ཉི་ནུབ་གསེར་མདངས་ངང་ནས་ཡང་དུ་ཚེས།།
ཕྱི་མིག་འདབ་མ་དགྱེས་པའི་ཉམས་ཚུལ་དུ།།
ཁྱོད་ཞལ་མེ་ཏོག་དགོད་པའི་དྲི་བཟང་གྲོལ།།
རྨི་ལམ་སྣ་ཚོགས་འདུས་པའི་དགའ་ཚལ་དུ།།
ཁྱོད་ཀྱི་མིག་འབྲས་སྐར་ཆུང་ཡི་གར་འཕྲོད།།