མི་རྟག་འཁོར་བ་རླབས་རིས་གཡོ་བ་ཅན།།
རླུང་གི་སྒྱུ་འཕྲུལ་ས་གཞི་ཡེར་ཡེར་འགུལ།།
ཆུ་ནང་ལྷུང་བའི་གནམ་གྱི་ཟླ་གཟུགས་དེ།།
ཡོད་ཡོད་ངང་ནས་མེད་པ་འགྱུར་བར་སྐྱེན།།
ནམ་མཁའ་འདི་ནི་སྟོང་ཞིང་ཡངས་པ་ལ།།
སྤྲིན་པ་དག་ནི་ཅི་ཞིག་འགྱུར་བར་འཚབ།།
ཐང་ལ་ལྷུང་བའི་གྲིབ་གཟུགས་ནག་པོ་དེ།།
འདུས་བྱས་ཟིལ་བ་འདོན་པའི་རི་མོ་ཡིན།།
སྨྲེང་བའི་གླུ་ཆུང་རང་བྱུང་ངག་ལས་གྲོལ།།
མི་རྟག་ཚིག་གི་འདབ་མ་གང་སར་བསྐྱོད།།
མར་མར་ལྷུང་བའི་གནམ་གྱི་ཆར་པ་ལས།།
སྲིད་པའི་ཞལ་གྱི་ངལ་དུབ་ཡང་དུ་མཐོང་།།
ཡིད་ལ་འཆར་བའི་ཕྱི་ནང་དངོས་པོ་དག །
མཚན་མོའི་གསེབ་ཀྱི་སྒྱུ་མའི་རྨི་ལམ་ཅན།།
ཚུར་ཚུར་མངོན་པའི་ཁ་དོག་སྣ་ཚོགས་དེ།།
མིག་ལ་ཡག་ཀྱང་མི་རྟག་འཕྲུལ་གྱིས་བྲིད།།
དབྱར་ལ་བཞད་པའི་མེ་ཏོག་མཛེས་པ་དེ།།
མི་རྟག་འཇའ་རིས་ཚེས་བའི་རི་མོར་འདྲ།།
འཁྲེང་བའི་དར་སྐུད་རིང་དུ་སྲིང་ན་ཡང་།།
རྟག་པ་མེད་པའི་རྨི་ལམ་ནང་བཞིན་ཡིན།།
ཚེ་ཡི་དར་ལྕོག་རླུང་གིས་བསྒུལ་གྱུར་ནས།།
གདོང་གི་གཉེར་རིས་ཇེ་མང་ཇེ་རིང་རེད།།
འཇིག་རྟེན་མ་ལུས་སྒྱུ་མའི་ངག་ལ་འཐིམ།།
ངག་ལས་མི་རྟག་གཞས་ཀྱི་སྨྲེང་བ་འདོན།།
སྒེའུ་ཁུང་ཕྱི་ལ་ཉིན་མཚན་རེས་ཀྱིས་གྲུབ།།
ཉི་ཟླའི་འོད་ཐིགས་ལན་རེར་ནང་ལ་ཚེས།།
སྒྱུ་མས་བསླུས་པའི་རང་བྱུང་མཛེས་པ་དེ།།
ཉིན་སྲིབ་ཟུང་གི་བར་ནས་ཡལ་བར་སྐྱེན།།
སེམས་སུ་ལྷུང་བའི་འཁོར་བའི་རི་མོ་འདི།།
དགུན་ཁར་ཆགས་པའི་ཆུ་ཡི་དར་ཁ་ལྟར།།
ཡོད་ཡོད་ངང་ནས་མེད་པར་གྱུར་བ་སྟེ།།
མི་རྟག་དབྱངས་ལས་སྒུལ་བའི་སྐྱོ་བ་ཡིན།།