འཇིག་རྟེན་འདི་ནང་ཅི་ཡང་འབྱུང་གིན་ཡོད།།
སེམས་ཁོང་འདི་ནང་ཅི་ཡང་འཆར་གྱིན་ཡོད།།
ཉི་ཟླ་འཆར་ནུབ་གཉིས་ཀའི་བར་གསེབ་ནས།།
ཕྱི་མིག་ཞེན་ཆགས་ཟེགས་མ་ཡང་ཡང་འཐོར།།
གཙང་པོའི་གཞས་སྒྲ་བར་མེད་རྣ་བར་བབས།།
རླབས་རིས་མེ་ཏོག་ཡང་ཡང་འགྲམ་ཁར་རྡེབ།།
མེ་ཏོག་འབའ་ཞིག་བསེར་རླུང་གར་ལ་འདྲེས།།
སྤྲིན་དཀར་གཡོ་ཕྱོགས་ཤིག་ཏུ་མགོ་ལྕོག་ལྡེམ།།
མི་ཚོགས་འཚང་ག་ཤིག་ཤིག་ལམ་ལ་འགྲིམས།།
ས་རྡུལ་སྐབས་རེར་འཚུབ་ཅིང་སྐབས་རེར་ཞི།།
ནམ་ཡང་མི་ཁོམ་འཇིག་རྟེན་འཁོར་བའི་ཀློང་།།
སྤྲོས་པ་དབྱངས་ཀྱི་འདབ་མ་རྒྱུན་པར་དཀྲོལ།།
འདུས་བྱས་གར་གྱི་སྒྱུ་འཕྲུལ་ཕྱོགས་ཀུན་རྩེན།།
ལྷིང་འཇགས་ཉི་འོད་ཟེར་མ་ཡང་དུ་དཀྲོགས།།
ལྗོན་ཤིང་འདབ་མར་ཟགས་པའི་ཟིལ་བུ་དག །
མི་རྟག་གཞས་ཤིག་དཀྲོལ་ཞིང་སྐྱེ་འཆི་བསྙད།།
ཡིད་ཀྱི་ངོས་སུ་བཞེངས་པའི་འཁྲེང་ཞེན་དག།
དུས་ཚོད་སྐུད་པར་བརྒྱུས་ནས་སྐར་ཚོགས་ཀྱི།།
ཁྲ་ཆུང་མིག་གི་མཚོ་མོར་མཆོང་བས་ན།།
ཡར་ཆུང་སྙིང་གི་ལྡེབས་ངོགས་དེ་བཞིན་ཚེས།།
སྒྱུ་མའི་དབྱངས་ཀྱི་གཡེང་དྲིལ་འགུལ་བས་ན།།
ཟག་བཅས་ཚིག་གི་མུ་ཏིག་མཛེས་པར་བཞད།།
གནམ་གྱི་སྐར་ཚོགས་བཀྲ་པའི་འཕྲུལ་པ་ལས།།
གཡོ་ཟོལ་འོད་ཀྱི་འཇའ་རིས་སེམས་སུ་དགོད།།