གངས་ཀྱི་འདབ་མ་རི་བོ་ཟོམ་དུ་འཐོར་འདུག །
སྨུག་པའི་དར་དཀར་ལྷབ་ལྷུབ་ཕྱོགས་སུ་རྒྱུ་སྟེ།།
ཕར་བལྟས་མིག་ལ་སྣང་བའི་མཛེས་པ་ཀུན་པོ།།
མ་བསུ་འཁྱུག་པ་སྟོན་གྱི་ལག་རྟགས་ཡིན་གྲང་།།
ཁུ་སིམ་སེམས་ཀྱི་ཚོར་བའི་ནགས་ཀླུང་སྟུག་པོ།།
གྲང་ངར་ཐེག་པའི་རླུང་བུས་ཡོམ་ཡོམ་བསྒུལ་ཏེ།།
སྟོན་ཁས་བསྣམས་པའི་དྲི་ངད་ཐར་ཐོར་རི་མོ།།
རང་བྱུང་ཡོལ་བ་བརྟོལ་ཏེ་སྣ་བར་བསྐྱལ་བྱུང་།།
སེམས་གཅོང་ན་བུན་ཐིབས་པའི་བུ་ཆུང་ང་ནི།།
ཁེར་རྐྱང་ཚོར་རིས་བྲན་པའི་གྲུ་ཆར་བསིལ་མ།།
དལ་གྱིས་འབབ་པའི་སྣང་བའི་རུམ་དུ་ལྷག་སྟེ།།
འདང་ནི་མ་གཡེང་ནམ་ཟླ་བརྒྱད་པར་ཐིམ་ཡོད།།
སྟོན་ཁའི་གྱེས་བྲལ་བྲིས་པའི་སྒྱུ་མའི་འཕྲུལ་པ།།
སེམས་ཀྱིས་མ་ཐེག་སྐྱོ་ཡུས་རིང་དུ་འཚེར་ཡོད།།
བས་མཐའ་རིང་པོར་ཉུལ་པའི་ལས་ཀྱི་སྐལ་བ།།
ཚེ་རབས་སྔོན་མའི་དགེ་སྡིག་གང་གི་ལན་ནམ།།
ས་འཛིན་ཁྱོན་ནི་གསེར་པོའི་རྒྱན་གྱིས་སྟར་ཏེ།།
ལམ་གྱི་འཁྲིས་སུ་བབས་པའི་ལྕང་སྡོང་ལོ་མས།།
སྟོན་རླུང་ཡོར་ཡོར་རུམ་དུ་གར་ལ་གཡེང་ཞིང་།།
གསང་བའི་གཏམ་རྒྱུད་ཅིག་གི་སྐྱོ་བ་སྲུང་འདུག།
ཤག་ཤག་སྒྲ་སྙན་གཙང་པོའི་ངག་གི་གཞས་ཏེ།།
ཁེར་རྐྱང་གསེར་ལོ་གང་དེ་རྒྱང་ལ་ཁུར་ནས།།
འགྲུལ་བཞུད་རིང་པོ་ཞིག་གི་ལམ་ལ་ཞུགས་ཏེ།།
ལོ་ཟླ་མོད་པོའི་ཕྲག་པར་ཁད་ཀྱིས་བརྒལ་སྲིད།།
ནམ་ཟླ་བརྒྱད་པར་ཁྲུང་ཁྲུང་མོན་ལ་འཕུར་དོན།།
སྟོན་ཁས་ཐེག་པའི་མ་སུབ་ལས་སྐལ་ཡིན་ནམ།།
ལྗང་ལོ་བཅོམ་ནས་འགོ་ལྕོག་ཐུར་དུ་སྒུར་དོན།།
སྡིགས་མོ་བད་ཀྱི་ངོམ་པའི་ཚུལ་གྱིས་ཡིན་ནམ།།
ང་ཡང་བས་མཐར་ཉུལ་ཏེ་ཁེར་རྐྱང་འཚོ་དོན།།
སྐྱེ་བ་གང་གིས་བསྟན་པའི་ལས་སྐལ་ཡིན་ནམ།།
མི་རྟག་དུས་ཚོད་མ་བརྟན་ལོ་འགྱུར་ཟླ་འགྱུར།།
མི་ཚེའི་འགྲུལ་བཞུད་རིང་པོ་གང་དུ་རྫོགས་སམ།།
༼ སྨྱུ་གུ་ཕྲ་མོ། ༽