དྲི་བྲལ་ཨ་སྔོན་དག་པ་ཡིད་འོང་ལྡན།།
སྤྲིན་དཀར་ཕང་ཕུང་མཛེས་པའི་གར་དུ་གཡོ།།
ཉི་གཞོན་གསར་པའི་དྲོད་ཁུལ་གུར་ཁང་འོག།
སྟོན་ཟླ་བརྒྱད་པའི་དཔལ་ཡོན་མཛེས་པ་མངོན།།
ལྗང་གཞོན་རིན་ཆེན་གཡུ་ཞུན་བྱུག་འདྲ་ཞིང་།།
ཡངས་པའི་སྤང་ཐང་སྔོ་བའི་མདངས་ཀྱིས་ཁྱབ།།
མེ་ཏོག་དུད་པའི་མགོ་ལྕོག་རླུང་གིས་ལྡེམ།།
ཞིམ་པའི་དྲི་བསུང་སྣ་ལམ་བཅུད་དུ་འཐིམ།།
ལྡེམ་ལྡེམ་རྩྭ་སྐྱ་འཇག་མས་ཤུགས་གླུ་གྱེར།།
ལྗོན་ཤིང་གསེབ་ནས་བྱ་བྱེའུས་གསུང་སྐད་སྒྲོག།
སྟོན་གྱི་འདབ་ལོ་སེར་ཆེན་ཕྱོགས་བཞིར་ལྷུང་།།
ཚོར་བའི་སྣང་བ་གཡོ་བའི་སྟོན་ཟླ་མཛེས།།
དྭངས་པའི་ཤང་ཤང་ཆུ་བོའི་རླབས་སྒྲ་སྙན།།
ཁོར་ཡུག་ལུས་ཟུངས་བརྟས་པའི་སྨན་དུ་བསྟིམ།།
ཡིད་འོང་ས་མཐོ་དྭངས་གཙང་སྟོན་ཟླ་འདིར།།
མཛེས་པའི་བཅོས་མའི་ངང་ཚུལ་དཔལ་དུ་བརྗིད།།
སྟོན་ཟླའི་ལོ་འབྲས་རབ་རྒྱས་ཡུལ་སྡེ་ཀུན།།
སྟོན་ལོ་སྡུད་བཞིན་སྣང་སེམས་གླུ་རུ་གྱེར།།
མགྲིན་སྔོན་ཅན་གྱིས་གླུ་དབྱངས་དེ་ཡང་སྙན།།
སྟོན་ཟླ་བརྒྱད་པར་འགྲན་ནུས་གང་ཞིག་མཆིས།།
བཟང་གསུམ་དཔལ་རྒྱས་གཟི་བྱིན་རབ་འབར་ཏེ།།
མཐོ་སྒང་མཛེས་ཀུན་རྫོགས་པའི་ཞིང་ཁམས་སུ།།
ཁྱད་མཚར་རང་བྱུང་མཛེས་པའི་ཟླ་གདོང་བཞིན།།
དཔལ་ཡོན་ཆུ་སྐྱེས་འཛུམ་པའི་རླབས་རིས་ངེས།།
༼ སྙན་རྐང་གླིང་། ༽