དུས་ཀྱི་རྟ་མཆོག་དཀར་པོའི།།
འཁོར་འགྲོས་བང་ཁ་མྱུར་ཨང་།།
བསམ་དབང་དྲན་དབང་མེད་པར།།
ནམ་ཟླ་དབྱར་ཁ་བསུ་སོང།།
སྔོ་ལ་ལྗང་བའི་ལྗོན་པ།།
གྲིབ་བསིལ་འགུག་པའི་གཞི་མ།།
ལྗོན་པའི་ཡལ་གའི་སྟེང་ནས།།
ཁུ་བྱུག་གསུང་དབྱངས་སྒྲོག་བྱུང་།།
ཞོགས་པ་མལ་ལས་ལངས་ཏེ།།
དྭངས་གཙང་མཁའ་རླུང་རྔུབ་ན།།
ཡིད་ཀྱི་ནམ་མཁའི་ལྷ་མོ།།
དགའ་བའི་འཛུམ་མདངས་ཤིག་ཤིག །
གཞུང་གི་ལས་བྱེད་རྣམས་ལ།།
ལོ་རེར་འཁོར་ཞག་ཡོད་ལ།།
འཁོར་ཞག་འཁོར་ནས་འགྲོ་བ།།
ལས་ཁུངས་ཤིག་གི་བཀོད་སྒྲིག །
དབྱར་ཁའི་དུས་བཟང་ཤར་སོང་།།
འཁོར་ཞག་འཁོར་ནས་སླེབས་སོང་།།
ཡིད་སེམས་བྲེལ་བས་ཁེངས་སོང་།།
ལོག་ཕེབས་སྐལ་བ་ལྡན་སོང་།།
མྱང་སྟོད་རྒྱལ་མཁར་རྩེ་ནས།།
མྱང་གཞུང་ལམ་ཐིག་དེད་དེ།།
སྐད་ཅིག་མ་ཡི་ནང་ལ།།
གཞིས་རྩེ་གྲོང་ལ་འབྱོར་སོང་།།
གཞིས་རྩེ་ཆོས་ཀྱི་ཕ་ས།།
པཎ་ཆེན་རིམ་བྱོན་བཞུགས་ས།།
གཙང་གི་མཚན་སྙན་འབར་ས།།
བཀྲ་ཤིས་ལྷུན་པོ་ཡིན་སོང་།།
ཆོས་ས་སེམས་པ་མ་ཤོར།།
གདན་ས་འཇལ་འདོད་མ་བྱུང།།
མགྱོགས་འགྲོ་མེ་འཁོར་བསྡད་དེ།།
ལྷ་ས་འཇལ་སར་སླེབས་སོང་།།
གནའ་གྲོང་འཇལ་གྲོང་ལྷ་ས།།
ཡུལ་སྐོར་འཇལ་སྐོར་འགྲོ་ས།།
ཡུལ་སྐོར་ཡིད་ལ་མ་དྲན།།
དྲིན་ཆེན་མ་ལོ་དྲན་སོང་།།
སྐྱིད་ཆུ་བཞུར་རྒྱུན་རིང་ཡང་།།
བཞུར་པའི་ལམ་ཕྱོགས་མ་གཅིག །
ཁྲུང་ཁྲུང་ལྷོ་མཐར་འཕུར་བ།།
སེམས་ཀྱི་འཁོར་ཕྱོགས་མ་ཡིན།།
དུས་བཞིར་མཛེས་སྡུག་ཆེ་བ།།
ནམ་ཟླ་དབྱར་ཁ་ཡིན་ཡང་།།
དབྱར་གྱི་ཡུལ་ལྗོངས་གསར་པ།།
གཟིགས་ཁོམ་ལྟ་ཁོམ་མ་བྱུང་།།
ལྷ་ས་ལྷ་ཡི་ཞིང་ཁམས།།
ཇོ་ཤཱཀ་རྣམ་གསུམ་བཞུགས་སར།།
བླ་ས་དཔོན་ས་བརྟན་ཡང།།
སེམས་ཀྱི་སྙེག་ལམ་མ་ཡིན།།
རིང་འགྲོ་འགྲུལ་བཞུད་མེ་འཁོར།།
བཅིབས་པའི་རྟ་རུ་བྱས་ཏེ།།
ཕ་ཡུལ་མཚོ་སྔོན་ཕྱོགས་སུ།།
ཉིན་མཚན་ངལ་བས་བརྒྱུགས་སོང་།།
འདུ་འཛི་ཟིང་ཟིང་ཆེ་བ།།
ཟི་ལིང་ཁྲོམ་གྱི་ཁྱད་ཆོས།།
ཟིང་ཟིང་ཁྲོམ་ལ་མ་ཆགས།།
རང་ཡུལ་ཞེ་ལ་ཐོགས་སོང་།།
སྐྱིད་པའི་སྒ་གོང་ཕྱོགས་སུ།།
སེམས་ཀྱི་རྟ་ཁ་གློད་སོང་།།
བརྒྱད་ཅུ་ལོ་ཡིས་ཟིན་པའི།།
མ་ལོ་འཕྲད་འདོད་སྐྱེས་སོང་།།
ཕ་ཡུལ་གྲོ་ལྷས་ཆགས་ས།།
རྨ་གཞུང་རྨ་ཆུ་ཁ་ཡིན།།
སྐྱེས་པའི་ལྟེ་ཁྲག་འཕོ་ས།།
གཡང་སྡེ་སྒ་གོང་ཕྱུག་མོ།།
རྨ་གཞུང་རྨ་ཆུའི་ཁ་ན།།
སྡེ་གཅིག་ཁྱིམ་གཅིག་ཆགས་ཡོད།།
ཁྱིམ་དེའི་ཨ་མ་བདག་མོར།།
གཅེས་པའི་བུ་དགུ་འཁྲུངས་ཡོད།།
བུ་དགུ་འཁྲུངས་པའི་ཨ་མ།།
སྲོག་དགུ་སྦྱིན་པའི་སྐྱེད་མ།།
ཁྱིམ་དགུ་བསྐྲུན་པའི་སྒྲོལ་མ།།
མཁས་དགུ་འབྱུང་བའི་གཞི་མ།།
འདོད་དགུ་སྟེར་བའི་སྐྱེད་མ།།
མཆོད་ན་མཆོད་པའི་ཐོག་མ།།
གླེང་ན་གཏམ་གྱི་འགོ་མ།།
བརྩེ་བའི་ཨ་མ་ཁྱོད་ཡིན།།
རྒྱང་བཞུད་ས་མཐའི་བུ་ལོའི།།
མགྱོགས་འགྲོས་བཅིབས་པ་རླུང་ཡིན།།
རླུང་གཤོག་མཁའ་རུ་བརྐྱངས་ནས།།
མི་འགྱང་མྱུར་དུ་བསླེབ་ཡོང།།
༼ སྒ་གོང་གཡུང་བྷ། ༽