ཤེས་རབ་མིག་ཟུང་ཡངས་མོར་ཞེན་པའི་རྐྱེན།།

གནས་ལྔ་རིགས་པའི་གཞུང་ལ་དུང་བའི་ཕྱིར།།

རེ་འདུན་རེ་ལ་འཚོལ་བའི་རེ་བ་འབུམ།།

ས་མཐར་ཡང་ཡང་འཁྱམ་པ་རང་གི་དོན།།

བདེན་དོན་རིག་པའི་ལམ་ལ་སྨོན་དང་གཅིག །

ལེགས་བཤད་བདུད་རྩིའི་ཚལ་ལ་མོས་དང་གཉིས།།

ཤེས་རིག་ཀུ་མུད་དགྱེས་ལ་དུངས་དྲག་པས།།

མི་ཚེ་འཚོལ་སྙེགས་ཀློང་ནས་གསོན་པ་ཡིན།།

བདེན་བཞིའི་དགོངས་དོན་རྟོགས་ལ་བྲེལ་བ་དང་།།

ཟབ་གསང་རིག་པའི་གནད་ཀྱང་བཀྲོལ་འདོད་པས།།

དཀའ་བའི་ཚེགས་ཀྱང་མ་འཛེམ་འགྲོ་དགོས་པ།།

ཐེངས་རེ་བསམ་ན་ལས་དབང་ཡིན་པར་སེམས།།

ཆ་མེད་བདེན་པར་འདོད་པའི་མདོ་སྡེ་དང་།།

སྣང་བ་སེམས་སུ་འདོད་པའི་སེམས་ཙམ་པའི།།

གསལ་དང་ལྷན་ཅིག་དམིགས་པའི་རྟགས་སྦྱོར་གྱིས།།

བརྒལ་བརྟག་འཕྲུལ་འཁོར་འཁྱུད་ལ་ལྟ་མོས་པས།།

སེམས་མཐའ་རྒྱང་ནས་མ་བསྐོར་ས་མཐར་ཉུལ།།

ས་མཐའི་འཚོ་བ་ཞིག་ལ་གདོང་གཏུགས་ནས།།

གྲོགས་མེད་གཅིག་པུར་ལུས་པ་འདི་ལྟར་ཡིན།།

བསམ་ན་ཚོར་སྣང་གྱ་གྱུའི་གཏམ་རྒྱུད་ཡོད།།

སྣང་ཙམ་དགག་བྱར་འདོད་པའི་ཐལ་འགྱུར་དང་།།

སྟོང་རྐྱང་མེད་དགག་བདེན་པའི་མིང་བསྙད་མཁན།།

ཐལ་རང་གཉིས་ཀྱི་གཡུལ་འགྱེད་ཤོར་ཚུལ་ལ།།

བསམ་གཞིག་མོས་པས་རང་སེམས་ལྷོད་ལ་བཞག །

ཐོབ་པའི་རེ་འབྲས་རྙེད་ཐབས་དཀའ་ན་ཡང་།།

ཡོད་ཚད་བློས་བཏང་རེ་བའི་འདུན་མ་འཚོལ།།

འཚོལ་སྙེགས་ཁྲི་འབུམ་ནང་ནས་འཚོ་བའི་ང་།།

བློ་བུར་ཕྱི་མར་ཆས་ན་ཡིད་རེ་མུག །

ལན་རེ་བསམས་ན་རང་ཉིད་འཁྲུལ་ནས་གདའ།།

ཐེངས་རེ་དྲན་དུས་གསོན་པ་དོན་སྙིང་འདུག །

ཁ་ཚོན་མ་ཆོད་མི་ཚེ་གཡར་མ་འདིའི།།

རང་གིས་འདོད་པ་ལྟར་གྱི་མི་ཞིག་བཅའ།།

ལྟོ་གོས་ཁ་ཟས་ཙམ་ལ་མ་ཆགས་པར།།

བསམ་པའི་མཐའ་ནི་ཅུང་ཙམ་ཡངས་པར་གདའ།།

ཉལ་དང་གཡེང་བའི་ལས་ཀྱིས་མགོ་འཁོར་བའི།།

ཁྱི་ཕག་བརྟུལ་ཞུགས་ཅན་ལས་ལྷག་པ་འདུག །

རང་རྨོངས་མུན་པའི་ཁྲོད་དུ་གནས་བཞིན་དུ།།

གཞན་གྱི་ཡོན་ཏན་མིག་གིས་མི་བཟོད་པས།།

བླུན་པོ་གོས་དཀར་བློ་སྙིང་ནག་པོ་ཅན།།

འདི་འདྲའི་སྣང་བརྙན་ཙམ་ཡང་ལྟ་སྙིང་བྲལ།།

སྤྱོད་པ་ཕལ་བའི་མི་དང་ཆེར་དམན་པའི།།

ང་རྒྱལ་རི་བོའི་གཟུགས་བཞིན་མཐོ་སྙམ་མཁན།།

མི་ཆོས་བླ་མའི་རྫུན་ལ་བྱང་ཆུབ་པའི།།

ཅོལ་ཆུང་བྱིས་པའི་བློ་ལ་ཁྲེལ་དགོད་འཆོར།།

རང་བྱུང་ཆོས་ཉིད་བུ་མོའི་མཛེས་ཉམས་ལ།།

སྒྱུ་འཕྲུལ་པིར་གྱིས་མཛེས་རིས་ཕབ་པ་ན།།

ཕྲག་པས་མ་བཟོད་སྡང་བའི་ཉམས་འགྱུར་ཅན།།

འདི་འདྲའི་གཤིས་ལ་ཞེན་པ་གཏིང་ནས་ལོག །

མགུར་མའི་སྙན་དབྱངས་རྣ་བར་ཐོས་པ་ན།།

ཉན་པར་མ་བཟོད་ཁྲོ་བའི་རྐྱེན་བསླངས་པའི།།

བླུན་པོའི་བློ་ཁོག་ཡུངས་འབྲུའི་བུ་ག་བཞིན།།

བདེན་གཏམ་གནས་ལུགས་ཤོང་སའི་སྣོད་མ་ཡིན།།

དེའི་ཕྱིར་ཤེས་རབ་ཅན་ལ་ང་དགའ་འོ།།

བརྩོན་སེམས་རེ་འདོད་ཅན་ལ་དེ་བས་ཀྱང་།།

སྨོན་ཚིག་གཅིག་ལས་མེད་ཀྱང་དབུལ་ན་འདོད།།

དགའ་བའི་རྣམ་འགྱུར་ཡིན་ཡང་མངོན་པར་མོས།།

བརྩོན་འགྲུས་ཆུ་རྒྱུན་རིང་མོ་དབེན་པའི་ལན།།

དཔྱོད་ཤེས་བློ་ལྡན་བཟང་པོ་མིན་པའི་སྐྱོན།།

ཕུན་ཚོགས་ལྔ་ལྡན་འཛོམས་པ་མི་སྲིད་ཀྱང་།།

རང་གིས་འདོད་པའི་དོན་ལ་འབད་འབུངས་བྱ།།

ཁ་ཡག་ངོ་བསྟོད་ཙམ་གྱིས་མ་བསླུས་པར།།

བཟང་ངན་དབྱེ་འབྱེད་ཙམ་ལ་མ་དོག་པས།།

ཕུགས་བསམ་ཡིད་ལ་བཅངས་པའི་དམ་ཚིག་གིས།།

རང་ཉིད་རང་གིས་གསལ་འདེབས་ཡང་ཡང་བྱ།།

༼ རྫ་ཤུལ་བློ་བཟང་། ༽