མཐའ་ཡས་འཁོར་བའི་གྲོང་དུ་གནས་ཤིང་།།
ཆགས་སྡང་རྒྱ་མཚོའི་འགྲམ་དུ་བཅར་ནས།།
ཡོད་ཡོད་འདྲ་བའི་མི་ཚེའི་ནང་དུ།།
རང་སེམས་དབྱངས་ཀྱིས་བརླན་པ་བྱས་བྱུང་།།
རེ་ཞིག་འཁོར་བའི་དབུས་སྒོ་བཀག་ནས།།
དམ་ཆོས་ཁང་བཟང་ཚལ་དུ་ཕེབས་ཀྱང་།།
ཡིད་འདི་རང་སར་སྡོད་དབང་མེད་པར།།
དཀར་དམར་མེ་ཏོག་ཐང་ལ་ཤོར་སོང་།།
མཁའ་ཀློང་མཛེས་པའི་དབྱིངས་ཀྱི་མཐོངས་སུ།།
ཉི་ཟླའི་སྡུག་གུར་རིང་ནས་འཛུམ་དུས།།
ཡིབ་མེད་ལྷ་ཡི་ཞལ་རས་གསལ་ན།།
ཚེ་འདིར་མི་ཡུལ་འགྲིམ་པའི་དོན་ཡིན།།
སྐྱེ་འཆིའི་ཟློས་གར་སེམས་ལ་དྲན་ཞིང་།།
མི་རྟག་འཁོར་བར་ངེས་འབྱུང་ཅི་སྐྱེ།།
ཟབ་ཟབ་བརྩེ་བའི་བུ་མོའི་ཕྱོགས་སུ།།
ངེས་མེད་རྒྱུག་པའི་སེམས་པ་མཐུར་མེད།།
འདི་ཡི་པད་འཛུམ་མིག་ལ་ཡག་ཅིང་།།
འདི་སྣང་སྨིག་རྒྱུ་ངོམས་མེད་རྒྱུ་དུས།།
འདི་བདེན་གང་དུ་མངོན་ཤེས་ཅི་འཚོལ།།
འདི་དག་ཡོངས་སུ་སྣང་བའི་སྒྱུ་འཕྲུལ།།
བན་བུན་ནགས་ཀྱི་ཚལ་དུ་སྤྲོ་བའི།།
ཁུ་བྱུག་གསུང་ངག་སུས་ཀྱང་བསྩལ་ཨང་།།
རང་སེམས་སྒུལ་བའི་དབྱངས་རྟ་འདི་ཡང་།།
མ་བཅོས་མགྲིན་པའི་དབུས་ནས་ཐལ་བྱུང་།།
བསམ་ཞིང་བསམ་ན་འཁོར་བའི་བྱིང་ན།།
འདྲ་མིན་རིགས་ཀྱི་བྱ་བ་མོད་ཀྱང་།།
ལས་ཀྱིས་བསྐོས་པའི་ལམ་ཆུང་ཕྲ་མོར།།
ཅི་ནས་སྐྱོད་བཞིན་མདུན་ལམ་ཚོལ་དང་།།
ལྷན་འཛོམས་འཚོ་བའི་དགོད་སྒྲ་ཡངས་མོ།།
ཕྱིར་དྲན་ཀློང་དུ་ཡང་ཡང་བྲིས་པས།།
བདག་གི་ཉི་མ་ནུབ་རིར་ཡིབ་པ།།
ད་ལྟ་ན་འང་དང་ལེན་མི་ཐུབ།།
སྙན་ཚིག་མེ་ཏོག་རིང་ནས་གྲོལ་དུས།།
སྡེབ་སྦྱོར་ལེགས་པ་ཐོལ་དུ་བྱུང་དུས།།
དགའ་སྐྱོའི་འཚོ་བ་གང་འདྲ་ཡིན་རུང་།།
སྦ་གསང་མེད་པར་འདི་རུ་གཏམ་ཆོག །
ཁ་བ་དཀར་དཀར་རི་མཐར་ལྷུང་དུས།།
གངས་ཀྱི་པང་ནས་ཕྱོགས་སུ་ལྟ་དུས།།
ཡིད་དགའི་ཚོར་བ་ཟབ་ཟབ་སྟེར་མཁན།།
རྒྱང་རིང་མཛའ་གཅུགས་དྲན་པ་སྐྱེན་སོང་།།
རྒྱུད་འཇམ་ཁ་བའི་རིགས་སྲས་བཟང་མོ།།
འཚོ་བའི་ངོགས་ནས་ལན་གཅིག་མཇལ་དུས།།
ཁེར་རྐྱང་འཁྱམ་པོའི་ཡིད་ཀྱི་ངོས་སུ།།
བསུབ་མེད་གཟུགས་མཛེས་གསལ་བར་དོད་སོང་།།
དྲན་པའི་སྣང་བ་ཕྱོགས་སུ་ཤོར་མེད།།
རིག་བྱེད་དབྱངས་ཀྱི་འཁྲིས་སུ་རྒྱུ་སྟེ།།
སྙན་སྙན་རོལ་མོ་དྲག་ཏུ་བརྡུངས་ནས།།
མི་ཚོགས་སེམས་པ་ལྷང་ལྷང་སྒུལ་ལམ།།
༼ ཁམས་ཟླ་སྲས། ༽