གངས་རི་བརྩེགས་པའི་ཞིང་ཁམས་སུ།།
སྐྱེས་པའི་སྨན་ཆུང་འཛུམ་ཡག་མ།།
ཤིན་ཏུ་མཛའ་བའི་རྣམ་འགྱུར་དག།
ཐོག་མ་ཉིད་ནས་ཡོད་པ་འདྲ།།
བདུད་རྩི་ཆུ་ཡིས་བཀྲུས་པ་བཞིན།།
ཞལ་རས་ཉ་གང་ཟླ་བའི་ཁྱིམ།།
ཚིག་གི་གཏང་རག་བྲི་འདོད་ཀྱིས།།
རྟོག་པའི་རླབས་ཀྱི་རྩེ་མོ་གཡོ།།
མཁུར་ཚོས་འོལ་མོ་སེ་སྨིན་མདོག།
གཡས་གཡོན་ཉི་ཟླའི་རྣ་ཆ་མཛེས།།
དུང་གི་སོ་ཕྲེང་དགོད་པའི་ཚེ།།
གངས་ལ་ཉི་མ་ཤར་བ་འདྲ།།
མིག་ཟུང་པདྨ་རང་བྱོན་ལས།།
ཞིམ་ངད་ལྡང་བའི་སྨིན་ལེགས་མ།།
ཟུར་མིག་གནམ་གྱི་སྐར་ཆེན་གྱིས།།
རྫུ་མའི་ནགས་ཚལ་སྟུག་པོ་ཁུར།།
ཤ་རྩ་དཀར་ལ་དམར་བའི་བཞིན།།
སྒྱུ་མའི་ཚོན་གྱིས་མ་བསྒྱུར་ཞིང་།།
ཀུན་ནས་ཀུན་ཏུ་སྒྲོས་པའི་ཞལ།།
རི་མོ་མཁན་གྱིས་བྲིས་མ་ལགས།།
བསེར་བུ་རླུང་གིས་བསྐྱོད་པ་ཡི།།
སྐྲ་གནག་རྒྱ་ལྕང་ཡངས་བའི་ཚལ།།
མུ་ཏིག་གཡུ་བྱུར་ཁྲ་ཚོམ་གྱིས།།
སྤུད་པའི་ཚུལ་འདི་འབྲོག་མོའི་གཤིས།།
པདྨའི་འདབ་ཀྱི་ལྗགས་ཡངས་ལས།།
དབྱངས་གསལ་ང་རོའི་སྒྲ་གྲགས་ཤིང་།།
དཀར་འཇམ་ལག་པའི་སོར་མོའི་བར།།
ཙན་དན་ཕྲེང་བའི་ཞགས་ཀྱང་ངོ་།།
ལྷན་སྐྱེས་བརྩེ་བའི་སེམས་པ་ལ།།
བྱམས་དང་སྙིང་རྗེ་ཡོད་ཚུལ་དང་།།
མ་བཅོས་གཤིས་ཀྱི་ཕྱི་ནང་དུ།།
ཁྲེལ་དང་ཕྱི་ཐག་ལྡན་པ་མཐོང་།།
༼ འོད་འཛིན་མ། ༽