བརྩེ་བ་སྙིང་ལ་བརྐོས་པའི་འདང་ཞིག་བཞག་ཡོད།།
དུང་བ་ཁྲག་ལ་འདྲེས་པའི་ཞེ་ཞིག་ཉར་ཡོད།།
དྲན་པ་རུས་ལ་ཟུག་པའི་པང་ཁུག་དེ་ན།།
འཛུམ་མདངས་སྣུམ་མདངས་ཅན་ཞིག་ལྷུག་པར་བཞད་ཡོད།།
ལོ་ཟླ་རྒྱང་ལ་བསྐྱོད་པའི་བཞུད་ལམ་འདི་ནས།།
དགའ་སྐྱོ་ཆུ་ལ་འདྲེས་པའི་གཏམ་ཞིག་འབྲི་འདོད།།
དྲན་གདུང་ནད་ལ་བསྒྱུར་བའི་རྨ་ཁ་ན་རུང་།།
དགའ་བ་སེམས་ནས་མི་འགྱུར་མནའ་ཡིས་མནན་ཆོག།
གདུང་བ་ཚིག་ལ་བྲིས་པའི་ལོ་ཟླ་རིང་རུང་།།
དགའ་བ་འཛུམ་ལ་ཤར་བའི་རྣམ་འགྱུར་མཐོང་ན།།
ཡིད་གཞུང་དྲོད་ལ་འཁོར་བའི་ཚོར་བ་བཙན་པོས།།
ཡིད་སེམས་ཁྱོད་ལ་མི་འཁོར་རང་དབང་ལྟ་ཅི།།
རྒྱབ་གཟུགས་སྐྱ་བོ་ཞིག་གི་གཡས་གཡོན་དེ་ལ།།
མིག་ཟུང་ཁྲ་ཆུང་ཞིག་གིས་སྐྱོར་མ་ངས་རྒྱག།
མཁུར་ཚོས་དམར་མདངས་ཅན་པོ་གྲང་གིས་ཁྱེར་ན།།
ལག་ཟུང་འཇམ་པོ་ཞིག་གི་ཤ་དྲོད་ངས་སྟེར།།
སྐྱིད་སྡུག་འཚོ་བའི་ལམ་འཕྲང་དོག་མོ་འདི་ནས།།
དགའ་སྐྱོའི་ཟློས་གར་གང་བྱུང་བློ་ན་མེད་ཀྱང་།།
དབུགས་ཀྱི་འབྱིན་རྔུབ་ཆད་པའི་ནངས་མོའི་བར་དུ།།
བསྟན་དུ་རྒྱབ་ནས་སྐྱོར་བ་སེམས་ཀྱི་དམ་བཅའ།།
༼ དབང་སྟོབས། ༽