ཁ་བའི་མེ་ཏོག་དཀར་པོ།།
སེམས་པ་གཏིང་ལ་སིམ་དུས།།
དྲན་པའི་མིག་མཐར་ཤར་བའི།།
སྐར་ཆེན་འཛུམ་མདངས་དྲན་བྱུང་།།
ལ་མོ་བརྒྱ་ཕྲག་ཕར་ན།།
ཁ་འབྲས་མིག་ལ་འཚམ་པ།།
སྐར་མའི་འཛུམ་མདངས་ཅན་པོ།།
སྙིང་གི་གཏིང་ལ་ཚེས་བྱུང་།།
གུར་ཆུང་སེམས་པའི་ནང་དུ།།
ཁྱོད་རང་ཕྱིར་ཕེབས་གནང་དང་།།
རེ་བའི་འདུན་པ་དཀར་པོ།།
ཉ་གང་ཟླ་ལྟར་རྒྱས་ཡོད།།
གཞོན་ཆུང་སྣང་བའི་མེ་ཏོག།
རླུང་བུས་ཤུགས་ཀྱིས་དེད་ཀྱང་།།
བརྩེ་སེམས་ལྷ་ལ་བཅོལ་པའི།།
ལྷ་ཤུག་འགྱུར་བ་མི་འདུག།
ཞག་གསུམ་བཞག་པའི་ཁ་བ།།
ཉི་མའི་འོད་ཀྱིས་བཞུར་ཡང་།།
ལོ་གསུམ་སེམས་ཀྱི་བག་ཆགས།།
ནམ་ཡང་བཞུར་པ་མི་འདུག།
དབྱར་གསུམ་མེ་ཏོག་དཀར་པོ།།
དཀོན་མཆོག་ལྷ་ལ་ཕུལ་ཀྱང་།།
མེ་ཏོག་སྟེང་གི་བུང་བ།།
ལྡིང་ཕྱོགས་ཁྱོད་ལ་བསྒྱུར་སོང་།།
སེམས་པ་འདམ་ལ་ཆགས་ཀྱང་།།
ལས་ཀྱིས་ལྷོ་མཐར་སྐྱོད་པའི།།
མཚོ་བྱ་ངང་པ་ངེད་གཉིས།།
ལས་ཀྱི་བཀོད་ཕྱོགས་གཅིག་ལགས།།
༼ བོད་སྨྱུག། ༽