རྫ་ཆུ།
རྫ་རིའི་སྦུག་ནས་སྙན་འཇེབས་ཀྱི་དབྱངས་རྟ་ཞིག་གི་
འགྲོས་དང་བསྡེབས་ནས།
ལྡེམ་མྱུར་གྱི་གར་མཁན་ཞིག་གི་ལུས་སུ་ཞུགས་ནས།
རྒྱང་རིང་གི་སྤང་ཐང་ཡངས་པོ་རུ།
ཉིན་མཚན་རྟག་སྦྲེལ་གྱིས།
རིག་རྩལ་གྱི་འཁྲབ་ཚན་གང་ཞིག་ཚར་མེད་པའམ།
གནའ་རབས་ཀྱི་གཏམ་རྒྱུད་ཅི་ཞིག་འཆད་མི་ཚར་བ།
ཡང་ན།
ཐག་རིང་ཐག་རིང་ན།
སུ་ཞིག་གི་ཁྱོད་རང་བསྒུགས་ཡོད།
ངའི་བཅོས་མིན་དྭངས་གཙང་གི་ཉིང་ཁུ་རྫ་ཆུ་སྔོན་མོ།
རྫ་ཆུ།
གངས་དཀར་གྱི་སྙིང་ག་ནས་བཞུར་བའི་
གྲེ་འགྱུར་མགྲིན་བཟང་ཅན།
ལང་ཚོའི་སྒེག་ཉམས་སྟོང་ལྡན་གྱི་
གར་མཁན་ལྡེམ་མྱུར་ཅན།
ཁྱེད་ཀྱི་ལྷག་བསམ་དང་སྙན་དབྱངས་ཀྱིས།
ཡོད་ཚད་གཉིད་ལས་སློང་བྱེད་ཀྱི་ཅོང་བརྡ་དང་།
སྐྱེ་འགྲོའི་ལུས་ཟུངས་རྒྱས་པའི་བདུད་རྩིར་གྱུར་ཏེ།
ཀུན་གྱིས་བསྟོད། ཡོངས་ཀྱིས་སྨོན།
དྲང་པོར་བརྗོད་ན།
ཁྱེད་ཀྱང་གདོང་དམར་བོད་མིའི་སྙིང་རྩ་བརྒྱུད་པའི་
ཟུངས་ཁྲག་དྲོན་མོ་དང་།
གངས་དཀར་ལྷུན་པོའི་བྲང་ཁོག་ནས་འབབ་པའི་
རྨ་ཆུ་སྔོན་མོའི་ཚ་བོ་ཡིན།
རྫ་ཆུ།
ཁྱེད་ཀྱིས་བརྩེ་དུང་གི་ཞེན་པ་འདི་དག་
སྙན་ངག་ལ་བརྩམས་ཤིང་།
ལས་དབང་གི་ངང་ཚུལ་དེ་དག་
གླུ་དབྱངས་སུ་གྱེར་ཏེ།
མེ་ཚེའི་བདེ་སྐྱིད་ཀྱི་འཚོ་བ་
བྲོ་གར་དུ་འཁྲབ་ནས།
ལུང་གཞུང་རིང་མོའི་ཁོར་ཡུག་ལ་
མཛེས་སྡུག་གི་དཔལ་ཡོན་སྟེར།
རྫ་ཆུ།
ངའི་སེམས་གཏིང་ན་ཡལ་དུ་མེད་པའི་གྱ་གྱུའི་རི་མོ་སྟེ།
ནམ་ཡང་མིག་ལམ་དུ་གཡོ་བའི་ལྷ་དར་དཀར་པོ་ཞིག།
( མཁས་གྲུབ་ནོར་བུ།)
