ཆོས་ཅན་སྒྱུ་མར་རྟོགས་ཤིང་།།
ཆོས་ཉིད་བདེ་བར་རོལ་བའི།།
འཁོར་འདས་ལྟད་མོར་གཟིགས་པའི།།
གུང་ཐང་རས་པ་དྲན་བྱུང་།།
སྤང་རྟོགས་ཉི་ཟླ་ཚེས་པ།།
འཕྲིན་ལས་ཉི་ཟེར་འཆར་བ།།
སྒྲུབ་བརྒྱུད་བསྟན་པའི་ཀ་ཆེན།།
མི་ལ་བཞད་པ་དྲན་བྱུང་།།
སྟོབས་ཆེན་སྙིང་རུས་མཆོག་ལྡན།།
སྐྱིད་སྡུག་གོང་ནོན་རས་པ།།
དགྲ་བོ་མཐའ་དག་བཅོམ་མཁན།།
ཚེ་གཅིག་སངས་རྒྱས་ཐོབ་མཁན།།
སྡུག་ཡུས་གཞན་ལ་མ་འཕང་།།
སྡུག་ཐེག་སྐྱ་རྔའི་བུ་ཆུང་།།
མར་པའི་གདམས་ངག་ཁོང་ཆུད།།
ཟླ་བྲལ་གངས་ཁྲོད་དཔའ་བོ།།
དགུན་གསུམ་ཁ་བ་བུ་ཡུག །
དཔྱིད་དབྱར་སྟོན་གསུམ་དྲོ་གྲང་།།
དེ་ཙམ་སྣང་དོགས་མེད་པའི།།
ཐར་ལམ་འཚོལ་བའི་རས་པ།།
དགྲ་གཉེན་ཆགས་སྡང་ཡུལ་དང་།
འཁོར་གཡོག་འདུ་འཛིའི་སྤྲོས་པར།།
བཅོས་མིན་ཞེན་པ་ཟློག་པའི།།
གུང་ཐང་མི་ལ་བཞད་པ།།
མར་པའི་ཐུགས་ཀྱི་བུ་ཆེན།།
མྱང་ཚའི་འདི་ཕྱིའི་འཁྲི་ས།།
འདོད་དོན་འགྲུབ་པའི་དཔའ་བོ།།
མང་ཡུལ་གུང་ཐང་རས་པ།།
ཆོས་ཅན་སྒྱུ་མའི་ཀློང་ནས།།
ཆོས་ཉིད་རྟོགས་མགུར་ལེན་པའི།།
ཆོས་ཀྱི་རྒྱལ་ཐབས་ཟིན་པའི།།
ཆོས་པའི་གཙུག་རྒྱན་མི་ལ།།
