ནགས་ཁྲོད་དབེན་པའི་དགའ་ཚལ་དུ།།
ངང་པའི་བུ་མོ་མཚོན་བྱེད་པའི།།
དབྱངས་ཀྱི་རུས་རྐང་གསོ་བའི་ལྷ།།
སྙན་ཚིག་ནང་གི་བརྗོད་གཞི་ཡིན།།
དྲན་པ་འདི་དག་སྤྲིན་པ་བཞིན།།
འཆར་ཡན་འདི་དག་རླུང་བུ་ལྟར།།
ཁྱོད་དང་ཁྱོད་ཀྱི་ཕྱོགས་མཚམས་སུ།།
རྨི་ལམ་ནས་ཀྱང་གྲངས་མེད་འཕུར།།
སྤྲིན་དཀར་མུ་ཏིག་དགོད་པའི་ཞིང་།།
རི་ཁྱུ་སྲོག་ཆགས་ཉལ་བའི་དུས།།
ང་དང་ཁྱོད་ཀྱི་གཞིས་ཀ་རུ།།
ངག་རིག་དབྱངས་ཀྱི་མེ་ཏོག་བཀྲ།།
ས་སྲོད་ཉི་མས་ནུབ་ར་བརྒལ།།
མཚོ་མཐའི་བྱ་ཚོགས་ཕག་ཏུ་ཡིབ།།
ཚིག་ལ་བཏབ་པའི་ཡིག་འབྲུ་དག།
ཞེ་འདང་ཀློང་ན་གར་དུ་རྩེན།།
མགུར་མས་མགུར་མའི་སྣ་དྲངས་ཏེ།།
ཚོར་བས་ཚོར་བ་འདྲེན་བྱེད་པའི།།
འཁོར་འདས་བར་ན་འཚངས་པའི་གླུ།།
བྱམས་པའི་སེམས་ཀྱི་ངོ་གདོང་བྱས།།
སྙན་ཚིག་སྙིང་གི་ཟེའུ་འབྲུའི་དབུས།།
འཛུམ་དཀར་དུང་གི་ཞལ་རས་ཅན།།
ཞེ་ཁྲེལ་མེ་ཏོག་དགོད་པའི་ཕྱིར།།
ལོ་ཟླས་ལོ་ཟླ་བསུས་ཏེ་བྲིས།།
འགྱུར་མེད་གཤིས་ཀྱི་སྙིང་ཁ་རུ།།
སྐྱིད་སྡུག་སེམས་པ་ཡོངས་གླན་ཏེ།།
འབྲལ་མེད་སྣང་བའི་གུར་ཁྱིམ་ན།།
བརྗེད་མེད་བརྩེ་བའི་རི་མོ་ཕབ།།
ཕྱི་ནང་གསང་བའི་ཚོར་འདུ་དག།
སྣང་བའི་ངོགས་སུ་སྦྱར་ནས་སུ།།
ཆོས་ཉིད་དེ་ཡི་ཕ་རོལ་ནས།།
ཞེ་མཐུན་དགའ་བའི་གླུ་དབྱངས་གྱེར།།
དྭངས་གཙང་མཚོ་མོའི་རབ་ཁ་ན།།
དཀར་གསལ་ཟླ་བ་ཤར་བ་བཞིན།།
བདག་གི་མགྲིན་པའི་ཡང་སྟེང་ན།།
ཁྱེད་ཀྱི་རྒྱབ་གཟུགས་ཁོ་ནར་གསལ།།
༼ འོད་འཛིན་མ། ༽
