国内统一刊号:CN51-0018-Z 中共甘孜州委机关报·甘孜日报社出版凝聚正能量·传播好声音

  • 日
    历
  • 上
    一
    期
  • 下
    一
    期

སྒྱུ་མའི་མགྲོན་པོ།

རེ་དོགས་སེམས་ལ་བཅངས་ནས་མདུན་དུ་ཆས།།

དཀའ་སྤྱད་སྡུག་རུས་མ་ཐུབ་སྒྱིད་ལུག་ཅན།།

ཕར་སོང་ལོ་ཟླ་ཅི་ཙམ་འདས་ཀྱང་རུང་།།

ཅང་འཁྱོང་མེད་པར་ཕྱི་ནང་དབུལ་པོ་ལུས།།

ཉི་མ་རྒྱང་ལ་ཡིབ་པའི་སྟངས་ཀ་ན།།

བྱ་བརྒྱ་མོན་ལ་ལོག་པའི་དགུང་ཁ་དེར།།

ཉེ་བའི་རྩི་ཐོག་དྲི་བཞོན་གྱིས་ཁྱེར་དུས།།

སྣང་བའི་བཤུག་གླུ་རྣ་བའི་ས་ན་འཇེབས།།

མི་ཚོགས་ཁྲོམ་ལ་རྒྱུ་བའི་ནམ་ཟླ་ལ།།

ཚོར་བའི་བཟི་ཁས་ཕབ་པའི་བརྩེ་བའི་གཏམ།།

རང་བློར་བབ་པའི་ན་ཆུང་རྐང་གཉིས་པར།།

སྦ་གསང་མེད་པར་ཡ་ཆུང་ཁོག་ནས་རྡོལ།།

ཁུ་བྱུག་ནགས་སུ་བྲོས་པའི་སྟོན་ཀའི་དུས།།

མེ་ཏོག་འགོ་བོ་གུད་པའི་དུས་ཀྱི་ཚེ།།

ལོ་མ་ཧྲུག་ཧྲུག་གང་སར་ཁྱེར་བའི་དབུས།།

ང་ཚོ་མི་དག་རིམ་བཞིན་རྒས་ཏེ་སོང་།།

ཞེན་ཆགས་རི་བོ་ལས་ཀྱང་ལྕི་ན་ཡང་།།

མི་རྟག་འཁོར་བའི་ཐེམ་གྱི་མགྲོན་པོ་སྟེ།།

རྟག་བརྟན་མེད་པར་ཡུད་ནས་འགྲོ་དགོས་ཀྱང་།།

འཚོ་བའི་སྐབས་སུ་དགའ་སྡུག་རང་གིས་སྙེག །

འདི་ན་དུས་བཞིའི་རྣམ་པ་རབ་འགྱུར་ཞིང་།།

མཁའ་ཡི་གློག་ཞགས་འདྲ་འདྲར་སྐད་ཅིག་ཏུ།།

མྱུར་བའི་དུས་ཚོད་མི་སྡོད་འཁོར་བ་བཞིན།།

རྣམ་ཤེས་སྐྱ་བ་ང་ཚོ་རིམ་བཞིན་འགྲོ།།

རི་སྐྱེས་རི་དྭགས་བྲག་གི་དབུས་སུ་སྤྲོ།།

ཉ་མོ་འཁྱུག་རྩལ་ཆེ་བ་ཆུ་གསེབ་མོས།།

མཁའ་ལྡིང་བྱ་ཡི་ཚོགས་དག་ནགས་སུ་རྒྱུ།།

འགྲོ་བའི་མི་རྣམས་སྲིད་པའི་འདམ་ལ་བརྒལ།།

ལ་ལ་རྒྱུ་ཆེན་སྟོབས་ཀྱིས་འཚོ་ན་ཡང་།།

འགའ་རེ་འབྲིང་པོའི་ཚོད་ཀྱིས་སྐྱིད་འདུག་ཀྱང་།།

ཡང་འགའ་ཧ་ཅང་དབུལ་གྱིས་ཉམ་ཆུང་ཡང་།།

ཐམས་ཅད་ཁྱད་མེད་འཁོར་བའི་མགྲོན་པོ་ཉིད།།

འདིར་བྲིས་ཚིག་གི་རི་མོ་ཅི་མཛེས་ཨང་།།

འདིར་བཞད་ཕྱག་གི་པད་དཀར་འཛུམ་གྲོལ་ཞིང་།།

འདིར་གསན་རྣ་བ་གསལ་བའི་རིགས་མཐུན་ལ།།

འདིར་འགུག་སྙན་པོ་གཞས་ཆུང་སྔོག་པ་དགེ།།

༼ ཁམས་ཟླ་སྲས། ༽